Instagram’dagi «food.travel» blogida Buxoro viloyati Qorako‘l tumani Quvacha qishlog‘idagi “Tangem” nomli oshxonada yovvoyi hayvon go‘shtidan tayyorlanayotgan taomlar haqida video e’lon qilindi. Ushbu videoda oshxona vakillari yovvoyi hayvon go‘shtlarini onkologiya va boshqa kasalliklarga davo sifatida tavsiya etishmoqda. Ushbu iddaolar ko‘pgina savollar va shubhalarni keltirib chiqardi, chunki bu kabi bayonotlarning ilmiy asoslari keltirilmagan.
Yovvoyi hayvonlarning go‘shtining kasalliklarni davolashdagi rolini ilmiy jihatdan tasdiqlovchi isbot mavjud emas. Shu sababdan, bu oshxona vakillaridan ushbu da’volarni ilmiy dalillar bilan asoslab berishlarini talab qilamiz. Aks holda, bunday nohaq axborot jamoatchilikning sog‘ligi uchun xavf tug‘dirishi mumkin.
Bundan tashqari, oshxona tomonidan ishlatilayotgan yovvoyi hayvonlar go‘shti qayerdan olinishi haqida ham savollar paydo bo‘lmoqda. Ushbu jarayonlar qonuniy ruxsatlar asosida amalga oshirilayotganligini aniqlash va atrof-muhitni muhofaza qilish nuqtai nazaridan tekshirish uchun, Buxoro viloyati Ekologiya, atrof-muhitni muhofaza qilish va iqlim o‘zgarishi boshqarmasi tomonidan “Tangem” oshxonasi faoliyati o‘rganilishini so‘raymiz.
Shuningdek, Buxoro viloyati ichki ishlar boshqarmasidan videoda yovvoyi hayvon go‘shti kasalliklarga davo ekanligi haqidagi iddaolarni yolg‘on axborot deb hisoblab, videodagi shaxslarning harakatlariga huquqiy baho berishini talab qilamiz. Noilmiy va asossiz da’volarni ommaviy tarqatish jamoatchilikni chalg‘itish va ularning sog‘lig‘iga xavf tug‘dirishi mumkin, shu sababdan bu kabi holatlarni qonuniy nazoratga olish muhim.
Mazkur holatda jamoatchilikka aniq, ilmiy asoslangan axborot yetkazilishi va atrof-muhitni muhofaza qilish choralarining kuchaytirilishi, aholining sog‘lig‘i va ekologik xavfsizlik nuqtayi nazaridan zarur hisoblanadi.
