Bugun, 11-noyabr kuni Ozarbayjon poytaxti Baku shahrida “Yashil dunyo uchun birdamlikda” (In Solidarity for a Green World) shiori ostida BMTning iqlim o‘zgarishi bo‘yicha doiraviy konvensiyasi ishtirokchilari konferensiyasining 29-sessiyasi (COP29) o‘z ishini boshlaydi.
COP29 doirasida Oʻzbekiston hukumati har bir tong gʻamxoʻrlik va iliqlik bilan boshlanadigan har bir xonadonning yuragi boʻlgan anʼanaviy oʻzbek hovlisiga asoslangan meʼmoriy konsepsiyasi asosidagi Milliy pavilyonni taqdim etadi. Yashillik va uzumzorlar bilan bezatilgan bu oilaviy hayot markazi inson va tabiatning uyg’un yashashini anglatadi.
Pavilyon O‘zbekistonning barqaror, an’anaviy materiallari va vaqt sinovidan o‘tgan, mamlakat iqlimiga mos qadimiy usullardan foydalangan holda qurilgan. Unda o’ziga xos suvoq, ayvon va tapchan kabi anʼanaviy elementlar aks etgan. Hovlidagi bu uchta element qulay va ekologik toza makon yaratish uchun birlikda ishlaydi. Suvoq haroratni barqarorlashtiradi va uyga estetik issiqlik qo’shadi, ayvon muloqot uchun salqin va ochiq joy yaratadi, tapchan esa oilaviy dam olish markaziga aylanadi. Ular birgalikda tabiatga g’amxo’rlik qilish, oilaviy an’analar va o’zbek xonadonidagi farovonlik kabi madaniy qadriyatlarni o’zida mujassam etgan.
O‘zbekiston Respublikasining “Ichkarida barqarorlik” pavilyonida mamlakatning o‘ziga xos madaniyati, tarixi va tabiati bilan shakllangan an’anaviy qadriyatlar va yondashuvlar haqida so‘z boradi.
Nargis Qosimova
