Voqea Oklenddagi estakada ostida avtomobil yonib ketishi bilan boshlangan. Hodisa joyiga yetib kelgan 29-mashina ekipaji yong‘inni bartaraf etib, hududni xavfsiz holatga keltirish ishlarini yakunlayotgan edi. O‘t o‘chiruvchilar jihozlarini yig‘ishtirayotgan paytda kutilmagan holat yuz berdi. Ularning oldiga bir kaptar yaqinlashib keldi. Qushning holati og‘ir edi. Kuchli tutun ta’sirida u nafas olishga qiynalayotgani, holdan toyganini ko‘rish mumkin edi. Guvohlarning aytishicha, kaptar go‘yo yordam so‘rayotgandek qutqaruvchilar tomon intilgan.

Vaziyatni darhol anglagan o‘t o‘chiruvchilardan biri asfaltga o‘tirib, kaptarga yordam bera boshladi. U maxsus kichik kislorod niqobini qushning tumshug‘i yoniga tutib, uning erkin nafas olishini ta’minlashga harakat qildi. Bir necha daqiqa davom etgan ushbu jarayon davomida ekipaj a’zolari kaptarning ahvolini kuzatib turdi. Ko‘p o‘tmay qushning holati yaxshilana boshladi. Nafasi tiklandi, harakatlari jonlandi va u yana qanot qoqishga muvaffaq bo‘ldi. Oradan biroz vaqt o‘tgach, kaptar osmonga ko‘tarilib uchib ketdi. Qutqaruvchilar uchun bu oddiy vazifadan tashqari, yana bir hayotni saqlab qolish bilan yakunlangan quvonchli lahza bo‘ldi.

Mazkur voqea aks etgan surat va videolar ijtimoiy tarmoqlarda keng tarqaldi. Ko‘plab foydalanuvchilar o‘t o‘chiruvchilarning mehribonligi va mas’uliyatini olqishladi. Ayrimlar buni “haqiqiy insonparvarlik namunasi”, boshqalar esa “har bir jon qadrli ekanining isboti” deya baholadi. Qutqaruvchilarning bu harakati befarq qoldirilmadi. Minnatdor fuqarolar tomonidan o‘t o‘chiruvchilarga maxsus mukofot va bir quti vegan shirinliklar yuborildi. Bu sovg‘a qahramonlarning insoniy fazilatlari va hayvonot olamiga bo‘lgan mehrini qadrlash ramzi sifatida topshirildi.

Mutaxassislarning ta’kidlashicha, yong‘in paytida hosil bo‘ladigan tutun nafaqat odamlar, balki qushlar va boshqa hayvonlar uchun ham jiddiy xavf tug‘diradi. Tutun tarkibidagi zaharli gazlar ularning nafas olish tizimiga tez ta’sir ko‘rsatib, hayotiga xavf solishi mumkin.

Oklenddagi ushbu voqea esa bir haqiqatni eslatadi: qahramonlik faqat katta jasoratlarda emas, ba’zan birgina ojiz jonzotga yordam qo‘lini cho‘zishda ham namoyon bo‘ladi. Bir kaptarning hayoti uchun bir necha daqiqa vaqt ajratgan o‘t o‘chiruvchilar butun dunyoga mehr-shafqat va insonparvarlikning yorqin namunasini ko‘rsatdi.